Upat ang kumpirmadong patay samtang kapin sa dose ang nangaangol human gikusokuso sa sunod-sunod nga kusog nga buhawi o tornado ang habagatang bahin sa Michigan, U.S.A niadtong Biyernes Marso 6,2026.
Tulo ang patay sa Union City (Branch County), samtang usa ang namatay sa Cass County.
Kapin sa 12 ka tawo ang daling gidala sa ospital human makaangkon og mga samad ug bali sa lawas.
Daghang balay ang nangaguba, nangalangkat ang mga atop sa mga building, ug nangatumba ang mga poste sa kuryente ug mga kahoy.
Sa mga video nga nag-viral sa social media, makita ang kalisang sa mga residente sa Three Rivers ug Union City samtang naglupad-lupad ang mga debris sa hangin.
Tungod sa maong kalamidad, gibana-banang duha ka milyang linya sa kuryente ang naputol, hinungdan nga daghang dapit ang walay kuryente karon.
Matod sa mga awtoridad, posibleng molungtad pa og pipila ka adlaw una mabalik ang suplay sa kuryente tungod sa kadako sa kadaot.
Gideklara na ni Michigan Governor Gretchen Whitmer ang State Emergency Operations Center aron paspasan ang paghatag og tabang sa mga biktima.
Sa pagkakaron, nagpadayon pa ang clearing operations sa mga dalan samtang nagpabiling alerto ang mga emergency services.
Photo Courtesy: Weather.gov
