Abli na ang usa ka temporary shelter alang sa mga pasyente gikan sa Polomolok nga naga-adto sa Davao City aron magpa-check-up ug magpa-treatment sa mga ospital sa syudad.
Gitawag kini og Balay Pag-Asa, ug nahimutang sa Barangay Pampanga, Davao City. Ang maong balay gamiton isip matuluyan sa mga Polomolokeño nga naga-uban sa mga pasyente o naghulat sa ilang medical appointments.
Gihimo ang soft launching sa Balay Pag-Asa niadtong Marso 7, 2026 alas otso sa buntag, uban sa presensya sa mga opisyal gikan sa Polomolok LGU, gipangunahan ni Mayor Bernie Palencia ug mga partner nga organisasyon.
Sumala sa mga tig-organisa, ang Balay Pag-Asa gitukod aron adunay kapuy-anan ang mga pasyente gikan sa Polomolok nga naga-adto sa Davao City alang sa ilang medical nga pagtagad.
Ang balay usa ka duha ka andana nga konkreto nga estruktura nga adunay tulo ka kwarto ug mas lapad nga espasyo nga mahimong gamiton sa mga pasyente ug ilang kauban sa ilang pagpabilin sa siyudad.
Gihimo usab ang house blessing ug ribbon cutting isip kabahin sa pag-abli sa maong pasilidad.
Ang temporary shelter gituyo aron makatabang sa mga pasyente nga nagkinahanglan og kapuy-an samtang anaa sa Davao City alang sa ilang medical treatment.
