Giawhag sa Department of Energy (DOE) ang publiko nga magpabiling kalmado dungan sa pagsiguro nga igo ang suplay sa lana luyo sa gipaabot nga dakong umento sa presyo sa produktong petrolyo tungod sa tensyon sa Middle East.
Sa Facebook post niadtong Sabado, giingon ni Energy Secretary Sharon Garin nga dili pa angay mausab ang presyo sa mga produktong petrolyo hangtod sa sunod nga Martes. Giawhag usab ni Garin ang publiko nga likayan ang pag-hoard o pagpondog daghang petrolyo.
Matod sa DOE, naghimo na ang kagamhanan og mga lakang aron masiguro ang kalig-on (stability) sa suplay sa lana sa nasod.
Gidugang pa nga ang mga fuel price adjustments kinahanglan mosunod sa gitakdang iskedyul, ug ang ahat nga pagsaka sa presyo (premature price increase) wala gitugot ubos sa mandato sa direktiba ni Pangulong Ferdinand Marcos Jr.
Subay sa pamahayag sa DOE, walay rason aron mag-panic buying. Ang nasod adunay igo nga suplay sa lana, ug ang mga ahensya sa gobyerno aktibong nag-monitor sa sitwasyon aron masiguro nga maprotektahan ang publiko.
Nakigtambayayong na usab ang DOE sa Department of the Interior and Local Government (DILG) ug Philippine National Police (PNP) aron inspeksyunon ang mga gasolinahan “aron mapugngan ang hoarding, profiteering, o pagmaniobra sa suplay.”
Photo courtesy: Department of Energy Philippines
