Gipasiugda ni Department of Education (DepEd) Secretary Sonny Angara ang dagkong reporma sa voucher program pinaagi sa mas lig-on nga pakigtambayayong sa mga pribadong eskwelahan. Tumong niini nga mas mapalambo ang implementasyon sa programa ug mas daghang kabatan-onan ang makadawat og kalidad nga edukasyon pinaagi sa tabang sa gobyerno.
Matod pa sa kalihim, importante ang papel sa private school partners sa pagpalapad sa oportunidad sa edukasyon alang sa mga estudyante nga gustong mosulod sa pribadong eskwelahan pinaagi sa voucher assistance.
Pinaagi niini, mas mapagaan usab ang kahuot sa mga pampublikong eskwelahan ug mas mahatagan og daghang kapilian ang mga ginikanan ug estudyante.
Gimando usab ni Angara ang Management Committee sa DepEd nga palig-unon ang classroom observation system ubos sa Teacher Growth and Performance framework.
Pinaagi niini, masubay ug mapalambo ang performance sa mga magtutudlo pinaagi sa regular nga obserbasyon ug feedback sa ilang pagtudlo sa klase.
Gilauman sa DepEd nga ubos sa mga reporma ug pagpalig-on sa monitoring system, mas mapataas ang kalidad sa edukasyon sa nasud ug mas matabangan ang mga magtutudlo nga mapalambo ang ilang kahusayan sa pagtudlo.
Kini kabahin sumala pa sa padayon nga paningkamot sa ahensya nga mapaayo ang sistema sa edukasyon sa Pilipinas.
Photo Courtesy : Philstar
