Mokabat na sa ikapito ka adlaw ang gubat sa Middle East karong adlawng Biyernes human gibombahan sa Israel ang habagatang bahin sa Beirut ug gipahibalo ang “next phase” sa ilang kampanya militar.
Nagpagawas una og evacuation warning ang militar sa Israel alang sa mga residente sa dapit sa wala pa ang pag-atake ug giawhag sila nga mobakwit dayon. Tungod niini, nagubot ug naghuot ang trapiko samtang nagdali sa pagbiya ang mga lumulupyo.
Misilaob ang tensyon human ni-atake ang Hezbollah isip panimalos sa kamatayon sa Iranian supreme leader nga si Ali Khamenei.
Sumala sa mga awtoridad sa Lebanon, miabot na sa 123 ka tawo ang nakalas sukad niadtong Lunes, samtang 683 ang nasamdan ug dili mominus sa 90,000 ang napugos sa pagbiya sa ilang mga balay.
Miabot na usab ang epekto sa gubat ngadto sa ubang nasod sa Gulf region diin adunay mga missile ug drone attacks sa Bahrain, Saudi Arabia, ug Qatar. Usa ka 11-anyos nga batang babaye ang namatay sa Kuwait, samtang unom ka tawo ang nasamdan human naigo sa mga nangatagak nga debris gikan sa usa ka drone sa Abu Dhabi.
Nikatap usab ang tensyon sa ubang bahin sa kalibutan human nagbahad ang Azerbaijan og posibleng bawos nga aksyon sunod sa drone attacks sa usa ka tugpahanan. Samtang, nagpadala og duha ka military aircraft ang Australia sa rehiyon, ug ang Canada nagpahayag usab nga mahimong magpadala sa ilang pwersa.
Sa hisgutanang politikal, gisupak ni Donald Trump ang posibilidad nga mopuli isip lider sa Iran si Mojtaba Khamenei.
Sumala sa usa ka state-run foundation sa Iran, miabot na sa 1,230 ang namatay sa mga airstrike sa Estados Unidos ug Israel, bisan tuod wala pa kini makumpirma sa mga independenteng tinubdan.
Samtang, gitaho sa militar sa Estados Unidos nga unom sa ilang mga sakop ang namatay sukad nagsugod ang gubat niadtong Sabado.
Photo courtesy: Mohamed Azakir/Reuters
