Gikompirma sa National Security Council (SC) nga adunay tulo ka kanhi opisyal sa gobyerno ang naghatag og pipila ka sensitibong impormasyon ngadto sa nasod sa China.
Sumala ni NSC Spokesperson Cornelio Valencia Jr., natultolan sa konseho ang giingong pagpadala og mga datos sa gobyerno sa China pinaagi sa LinkedIn ug uban pang messaging apps.
Gipasabot ni Valencia nga nakakuha og access ang tulo ka Pilipino sa mga impormasyon sa nagkadaiyang pamaagi. Ang usa kanila kanhi assistant sa Department of National Defense (DND), ang ikaduha kanhi researcher sa Philippine Navy, ug ang ikatulo adunay koneksyon sa usa ka opisyal sa Philippine Coast Guard (PCG) nga adunay access usab sa pipila ka sensitibong datos.
Lakip sa mga impormasyon nga naggawas ang mga detalye mahitungod sa military engagement ug mga personahe, apil na ang rotation and resupply (RORE) mission sa Ayungin Shoal ug sa BRP Sierra Madre, nga nagsilbing outpost sa Armed Forces of the Philippines (AFP) sa West Philippine Sea.
Gipasalig ni Valencia nga hugot nga gina-monitor sa NSC ang isyu sa pang-espiya sa nasod, ilabi na ang paggamit sa ubang nasod sa mga Pilipino isip ilang mga ahente.
Dugang pa niya, padayon ang koordinasyon sa NSC sa uban pang ahensya sa gobyerno aron mapugngan ang bisan unsang hulga sa nasudnong seguridad. Kini nga insidente nagdugang sa nagkadakong kabalaka mahitungod sa mga espionage activities sa rehiyon, dungan sa nagkagrabe nga tensyon sa West Philippine Sea.
Photo courtesy: Global News
