Gipahimangnoan sa mga industry groups, nga ang sugyot sa gobyerno sa Pilipinas nga ipatuman ang four-day workweek aron makadaginot sa enerhiya taliwala sa tensyon sa Middle East, mamahimong makaapekto sa delivery schedules sa mga sektor sa manufacturing ug Business Process Outsourcing (BPO).
Matod ni Elizabeth H. Lee, ang executive director sa Federation of Philippine Industries (FPI), magkalahi ang epekto niini sa matag industriya. Pasabot niya, sa manufacturing, gikinahanglan ang walay hunong nga produksyon, busa kinahanglan nga tun-an og maayo ang epekto niini sa supply chain ug ang kompetisyon batok sa ubang nasod.
Nipasidaan usab si Donald Patrick L. Lim, presidente sa Management Association of the Philippines (MAP), nga ang mga industriya nga nagsalig sa global schedules—sama sa BPO ug logistics—mamahimong mag-atubang og pagkabalda sa operasyon ug produktibidad.
Sa pikas bahin, ang labor lawyer ug presidente sa Federation of Free Workers nga si Jose Sonny G. Matula, nagpahinumdom nga ang compressed schedule moresulta sa mas taas nga tingtrabaho (10 ka oras kada adlaw) nga makapaluya sa mga trabahante. Matod niya, kinahanglan unahon ang kaluwasan ug kusog sa mga mamumuo.
Nanawagan usab ang Philippine Chamber of Commerce and Industry (PCCI) pinaagi ni Presidente Ferdinand A. Ferrer nga kinahanglan adunay saktong konsultasyon sa mga stakeholders sa dili pa kini ipatuman. Matod ni Ms. Lee, wala pay nasod sa Southeast Asia ang nagpatuman niini sa tibuok nasod, busa mas maayo nga sugdan una kini sa mga pilot program aron makita ang tinuod nga datos.
Photo courtesy: Manila Bulletin
