Wala makabangon ang Philippine women’s national football team sa nagpadayon nga AFC Women’s Asian Cup.
Natagamtaman sa Pilipinas ang laing kapildihan sa continental tournament human sila gipukan sa South Korea, 0-3, niadtong Huwebes sa gabii didto sa Robina Stadium sa Gold Coast, Australia.
Nangulo na ang mga Koreans, 2-0, sa halftime, tungod sa ilang paspas nga pagpasa nga nagguba sa linya sa depensa sa Pilipinas.
Unang nipuntos si Eon Yugyeong sa ika-12 nga minuto, nga gisundan sa goal ni Park Soojeong paglabay sa tulo ka minuto, diin naigo niini ang taas nga kanto sa net human malabyan ang goalkeeper nga si Olivia McDaniel.
Sa ika-45 nga minuto, nakahigayon pa si Carleigh Frilles sa Filipinas pinaagi sa usa ka layo nga tira gikan sa gawas sa box, apan nasalbar kini sa ilang karibal.
Nakit-an ni Mun Eunju sa Korea ang laing goal alang sa ilang koponan sa ika-56 nga minuto, hinungdan nga hingpit nilang nakuptan ang kontrol batok sa ilang kaatbang gikan sa Southeast Asia.
Sunod nga makasangka sa Filipinas ang nasod sa Iran karong Dominggo, Marso 8, sa susamang venue. Musulod ang koponan sa usa ka lisod nga sitwasyon sa kompetisyon ilabi na nga ang kwalipikasyon alang sa World Cup ang nakataya.
Photo courtesy: The Philippine Football Federation
