Usa ka syudad sa Wichita Falls sa Texas, nakabantog karon tungod sa usa ka building nga giingong pinakagamay nga skyscraper sa kalibutan—bisan og halos pareho lang og gitas-on sa usa ka dako nga balay.
Ang maong building mao ang Newby-McMahon Building, nga adunay gitas-on nga 40 ka tiil lamang. Kung tan-awon, murag ordinaryo ra nga building, apan kaniadto giingon kini nga mahimong usa ka dakong “skyscraper” sa syudad.
Sumala sa kasaysayan, niadtong sayong bahin sa 1900s, misaka ang ekonomiya sa Wichita Falls tungod sa oil boom. Tungod niini, daghang negosyante ang nangita og opisina. Usa ka negosyante nga ginganlan og J.D.D. McMahon ang misugyot og tukoron nga dakong opisina nga building.
Daghang investors ang nadani sa iyang plano ug nakalikom siya og kapin $200,000 para sa proyekto—nga dako na kaayo nga kantidad niadtong panahona.
Apan diha na nagsugod ang kataw-anan nga twist. Sa blueprint sa building, nakasulat nga 480 inches ang gitas-on—dili 480 feet. Tungod kay wala kini mabantayi sa mga investors, nagtukod si McMahon og building nga gamay ra kaayo kumpara sa ilang gilauman.
Pagkahuman sa konstruksyon, nakurat ang mga investors kay ang ilang “skyscraper” murag mas taas pa ang poste sa kuryente. Gisulayan nila og kaso ang negosyante, apan wala sila pabore sa korte tungod kay klaro man diay sa plano nga inches ang sukod.
Mas nakakatawa pa, ang kompanya nga motukod unta og elevator mihawa sa proyekto pagkahibalo nga gamay ra kaayo ang building. Tungod niini, ang paagi sa pagsaka sa taas nga floor kaniadto mao ang hagdan nga nakabitay sa gawas sa building.
Sa paglabay sa panahon, napasagdan ang building ilabi na sa dihang nahuman ang oil boom ug nagsugod ang Great Depression.
Apan karon, bisan og kaniadto usa kini ka dakong kaulaw sa syudad, nahimo na kini nga usa sa mga tourist attraction sa Wichita Falls. Daghang bisita ang moadto aron makita ang building nga giingong “World’s Littlest Skyscraper.”
Busa matod pa sa mga lokal: kung gusto kag skyscraper nga dili ka kapoyan og saka, adto na lang sa Wichita Falls—kay gamay ra kaayo nga skyscraper ang imong maabtan.
Photo Courtesy:TwistedSifter
