Nanawagan ang Pagkakaisa ng mga Samahan ng Tsuper at Operator Nationwide (PISTON-Cebu) ngadto sa gobyerno nga maghimo og konkretong mga lakang aron mapagaan ang epekto sa posibleng pagsaka sa presyo sa produktong petrolyo nga giingong maapektuhan sa nagpadayon nga tensiyon sa Middle East.
Matod ni Greg Perez nga bisan global nga isyu ang lihok sa presyo sa lana, adunay kapasidad ang gobyerno sa pagpatuman og mga polisiya aron dili mabug-atan ang mga drayber ug gagmayng operator.
Gipasabot usab sa grupo nga dili igo nga mosalig lang sa mga temporaryong ayuda sama sa fuel subsidy, ilabi na kay dili tanan sa sektor sa transportasyon ang makadawat niini.
Dugang pa ni Perez, mas angay tutokan sa gobyerno ang mas lapad nga reporma sa industriya sa lana ug ang maayong pagdumala sa lokal nga oil reserve sa nasod, lakip na ang reserba sa lungsod sa Alegria.
Gihingusgan usab sa PISTON-Cebu ang panginahanglan nga aksyunan dayon sa Land Transportation Franchising and Regulatory Board o LTFRB ang ilang petisyon alang sa dugang plitehan, ilabi na kon mopadayon ang pagsaka sa presyo sa krudo nga direktang makaapekto sa operasyon sa mga drayber ug gagmayng operator.
