Patay nang nakaplagan ang babaye nga biktima human gitigbas sa may Purok 2-C, Namnam, San Fernando, Bukidnon alas 5:15 sa buntag March 4, 2026
Giila ang biktima nga babaye, 47-anyos, ug ang iyang live-in partner, lalaki (karon stable ang kondisyon), 47-anyos, parehong residente sa Purok 3, sa nahisgutang lugar
Sumala sa pakighinabi sa Juander Radyo Malaybalay kang PCapt. Sheila Joy Hangad tigpamaba sa Bukidnon Police Provincial Office gibutyag nga napalgan ang babaye nga biktima nagbuy-od na sa yuta daplin sa karsada duol sa itom nga Kawasaki Bajaj 125 nga motorsiklo, nga adunay dakong samad tinigbasan sa tiyan. Samtang, ang lalaki nga biktima, kinsa nakaangkon og samad sa iyang bukton, gidala na sa BPH–San Fernando aron matambalan.
Nasayran nga samtang sakay sa ilang motorsiklo ang mga biktima padulong unta mopauli sa ilang panimalay kalit mitungha sa dalan ang wala mailhing suspetsado pag-abot sa dapit ug giatangan sila dayon tigbas sa sanggot, pagkahuman misibat sa wala masayring direksyon.
Sa karon ang kapolisan San Fernando uban ang koordinasyon sa mga personahe sa 1003rd MC, RMFB 10, nagpahigayon sa hot pursuit operation alang sa pag-ila ug pagdakop sa miikyas nga suspetsado.
Padayon sab ang makuting imbestigasyon sa panghitabo kung asa gituohang ang mga biktima nadamay sa giingong “pangayaw” usa ka praktis sa tribu sa maong lugar.
Photo Courtesy: San Fernando Municipal Police Station
