Gibida ni U.S. President Donald Trump ang iyang mga nahimo sulod sa usa ka tuig, ilabi na ang kalampusan sa ekonomiya ug seguridad sa Amerika. Sumala ni Trump, napaubos sa iyang administrasyon ang core inflation ngadto sa kinaubsang ang-ang sulod sa kapin lima ka tuig.
Gisaway usab niya ang kanhi presidente nga si Joe Biden, kinsa sumala pa ni Trump, nihatag sa Amerika sa kinagrabihang inflation sa kasaysayan sa nasud.
Dugang pa niini, gipasigarbo ni Trump ang paglambo sa stock market nga nakatala og 53 ka “all-time record highs” sukad siya nidaug, ug ang pagkuhit og kapin $18 trillion nga investments sa unang tuig sa iyang pagpangalagad.
Gihisgutan usab sa Presidente ang isyu sa immigration, diin iyang gipanghambog ang pagkunhod sa gidaghanon sa illegal immigrants ug ang pagsulod sa illegal nga fentanyl nga miusos og 56%. Matud pa niya, natala usab ang kinaubsang ihap sa mga illegal immigrants sa utlanan sa US ug Mexico sa miaging tuig.
Gipasigarbo pa ni Trump ang kakusog sa militar ug kapulisan sa Amerika, dungan sa pag-ingon nga ang ubang nasud aduna nay pagrespeto pag-usab sa Estados Unidos.
Isip usa ka fan sa sports, wala usab niya sipyata ang pagdayeg sa kadaugan sa US hockey team nga nakakuha og bulawan sa winter Olympics.
Photo Courtesy: PBS
