Gipahibalo sa air force nga mokabat sa 15 ka mga indibidwal ang patay sa nahitabong pagkahagsa sa usa ka military helicopter sa habagatang Peru niadtong nakalabay nga adlaw ug usa ka gamay nga iro lamang ang bugtong naluwas.
Sumala sa mga otoridad nga naghigda kini tupad sa lawas sa iyang tag-iya nga si Colonel Javier Nole, 50-anyos, nga sakay usab sa helicopter uban sa asawa ug duha ka anak niini nga babaye.
Lakip sa 15 ka namatay ang pito ka mga bata, diin ang maong helicopter bag-o lamang gi-deploy alang sa rescue operations sa mga biktima sa baha.
Dugang pa sa report nga ang iro nagpakita nga anaa sa maayong kahimtang, apan gidala gihapon kini sa usa ka beterinaryo isip dugang nga pag-atiman ug pag-amping.
Sa pagkakaron ang air force padayon nga nagbuhat ug imbestigasyon aron matino ang hinungdan sa maong insidente.
Photo Courtesy: CNA.AL
