Hapit na mapasar ang dugay nang gihangyo ug gipaabot nga ordinansa sa syudad nga magtugot sa pagtaas sa plete sa mga motorela, lakip sa tumong nga madugangan ang kita sa mga driver sa dakbayan.
Sa eksklusibong pakighinabi sa Juander Radyo Malaybalay, gipadayag ni City Councilor Rendon Sangalang, usa sa nagduso sa maong ordinansa, nga ang gisugyot pagsaka sa pletehan ipahiuyon sa bag-ong minimum wage sa rehiyon. Matod pa niya, aduna nay gi-basehan nga matrix ang syudad aron masiguro ang makiangayon ug hustong usbaw niini diin 13 pesos ang gikasabutan nga ipatuman isip minimum fare sa sugyot.
Gipasabot sa opsiyal nga gitimbang pag-ayo ang kantidad aron dili usab mabug-atan ang mga pasahero samtang ginatabangan ang mga driver nga mosaka ang ilang kita, ilabina sa nagkataas nga presyo sa mga palaliton ug gasolina sanglit magpabilin ang 20 porsyento nga diskwento alang sa mga Senior Citizens, Persons With Disabilities (PWDs), ug mga estudyante, subay sa kasamtangang mga regulasyon.
Hisayrang bag-ohay lang sab nagpahigayon og public hearing ang lokal nga panggamhanan uban sa mga stakeholders, nga giuyonan sa kadaghanan ang maong sugyot atol sa maong konsultasyon. Bisan pa niini, dili pa dayon ipatuman ang pagsaka sa plete tungod kay adunay mga proseso nga angay pang agian, lakip ang pinal nga aprobasyon sa konseho sa dili pa kini mahimong balaod.
Sa pagkakaron, nagpaabot ang mga driver ug pasahero sa pinal nga desisyon sa konseho mahitungod sa maong ordinansa nga naglaum nga makabalanse sa interes sa parehong sektor.
Photo Courtesy: LGU Malaybalay
