Nagpadayon ang exploratory ug pormal nga negosasyon tali sa Pilipinas ug Canada alang sa usa ka posibleng Free Trade Agreement (FTA), nga gitan-aw isip usa ka mahinungdanong lakang sa pagpalig-on sa bilateral nga relasyon sa duha ka nasud.
Sumala sa mga opisyal sa Department of Trade and Industry (DTI), ang sunod nga round sa formal talks gikatakda sa Abril 2026, diin mas lawom nga hisgutan ang mga kapitulo sa trade in goods, services, investments, ug trade facilitation.
Tumong sa giplanong kasabutan ang pagpalapad sa market access pinaagi sa pagkunhod o pagtangtang sa tariffs sa nag-unang export products sa duha ka nasud.
Lakip sa ginatan-aw nga makabenepisyo ang agrikultura, processed food, manufacturing, information technology, ug renewable energy.
Gilauman usab nga ang mas klaro nga investment rules ug dispute settlement mechanisms makahatag og dugang kumpiyansa sa mga negosyante ug foreign investors.
Base sa pinakabag-ong datos, ang bilateral merchandise trade sa 2024 miabot og kapin $3 bilyon Canadian, samtang padayon usab ang pagdagsa sa Canadian investments sa Pilipinas, ilabi na sa mining, energy, ug infrastructure.
Ang presensya sa mga pinoy sa Canada usa usab ka hinungdan nga nagpalig-on sa economic ties, ilabi na sa remittances ug serbisyo. Samtang nagpadayon ang negosasyon, giila sa mga economic managers nga ang maong FTA mahimong maghatag og dugang kusog sa export competitiveness sa Pilipinas ug magbukas og bag-ong oportunidad sa teknolohiya ug innovation partnerships.
Bisan pa man, ang gobyerno nagpasalig nga ang interes sa lokal nga industriya ug mag-uuma protektahan pinaagi sa angay nga safeguards samtang ginahimo ang kasabutan.
Photo Courtesy : Pilipino Mirror
