Mokabat sa 15 ka mga miyembro sa New People’s Army (NPA) ang nakaengkwentro sa tropa sa 8th Infantry “Dependable” Battalion sa Philippine Army buntag niadtong Pebrero 15, 2026 sa bukirong bahin sa Sitio Tacocon, Barangay Kasapa II lalawigan sa Agusan del Sur.
Sumala sa militar, ang grupo gipangulohan sa lima ka indibidwal lakip si alyas “Tado,” nga napatay sa nasangpit nga panagsangka, giila nga high-ranking NPA official nga naglihok sa mga boundary area sa Bukidnon ug Agusan del Sur.
Matod ni Lt. Col. Jorge Jallorina, Commander sa 8th Infantry Battalion, dugay na nilang ginabantayan ang grupo ni Tado ug uban pang rebelde sa nasangpit nga sitio. Nadiskubre sa militar nga nagtapok ang mga rebelde alang sa usa ka miting hinungdan nga nahitabo ang unang engkwentro mga alas 8:30 sa buntag. Samtang gisubay sa kasundaluhan ang withdrawal route sa kalaban, misunod ang ikaduhang engkwentro mga alas 11:30 sa buntag sa maong adlaw.
Sa operasyon, narekober sa tropa ang usa ka M16A1 rifle nga giingong gigamit sa usa sa mga target nga dugay nang ginapangita sa militar. Wala’y naitalang kaswalti sa panig sa kasundaluhan ug nagpadayon ang hot pursuit operation aron masundan ang nahibiling mga miyembro sa grupo.
Padayon usab ang sub-tracking sa militar sa mga rota sa pag-atras sa mga rebelde, kinsa dugay nang gi-monitor sa lugar. Daghang combat ug operating troops ang gipahimutang sa sitio isip kabahin sa mas gipakusog nga kampanya batok sa insurgency.
Gilauman sa militar nga mapadayon ang operasyon aron madakpan o ma-neutralize ang nahibiling liderato sa grupo ug mapalig-on ang paningkamot sa gobyerno sa paghuman sa insurgency sa Bukidnon.
Photo Courtesy: 4O3rdIB PA
