Padayon ang pagpahigayon sa tinuig nga BOSS o Business One-Stop Shop Program sa Business and Licensing Division Office sa Malaybalay City aron mapadali ang pagkuha ug pag-renew sa business permits sa mga negosyante sa syudad.
Kahinomduman nga bag-o lang nahuman ang tulo ka adlaw nga pagdala sa serbisyo sa Basakan District sa milabayng bulan nga gitambungan sa mga negosyante gikan sa 10 ka barangay. Gisundan usab kini sa Upper Pulangi District nga nakaserbisyo sa 8 ka barangay, isip kabahin sa pagpaduol sa serbisyo sa lokal nga panggamhanan ngadto sa komunidad.
Sa eksklusibong pakighinabi sa Juander Radyo Malaybalay, gibutyag ni Salvador Yacapin, Licensing Officer IV, nga gikan niadtong Enero hangtod ning Pebrero, naka-tala na ang ilang buhatan og 5,925 ka mga negosyante nga nakalukat o naka-renew sa ilang business permits 633 niana ang mga bag-ong negosyo nga naglukat og permit samtang 5,292 ang nagpa-renew.
Dugang pa ni Yacapin, ang ilang target moabot sa 7,000 kapin ka mga negosyante ang makalukat ug maka-renew sa permit karong tuiga, ug sa pagkakaron hapit na mahuman ang proseso tungod kay mga 85% na ang natuman.
Samtang mag-atobang na sa penalidad kadtong malangan og renew tungod kay natapos na ang panahon sa paglukat nga walay penalty niadtong Enero. Gipasabot usab niya nga padayon nga modawat ang ilang opisina sa mga aplikante alang sa pagkuha ug pag-renew sa business permits didto sa Malaybalay City Hall, ug giawhag ang mga negosyante nga magtuman sa hustong panahon aron malikayan ang multa.
Photo Courtesy: LGU MALAYBALAY
