Kung nagtuo ka nga ang problema sa kaminyoon ang pirmi nga away, sa United Arab Emirates, lahi ang istorya kay didto, usa ka asawa ang nangayo og diborsyo tungod kay nasobrahan kabuotan ang iyang bana.
Sumala sa mga taho, miadto sa Shariah Court sa Fujairah ang usa ka babaye aron makigbulag sa iyang bana human sa usa ka tuig nilang kaminyoon. Ang rason? Wala gyud kuno siya kasuway nga gisuk-an, gisupak, o gi-away sa iyang bana.
Matod pa sa asawa, “Nasuffocate ko sa sobra nga gugma ug pagtagad.” Aron mas “grabe” pa gyud, ang bana motabang pa kuno sa pagpanglimpyo sa balay ug pirmi siyang pasayloon sa tanang butang. Para sa asawa, dili na kuno normal kay gusto siya makasinati bisan usa lang ka lalis o seryosong diskusyon.
Sa pikas bahin, ang bana nag-ingon sa korte nga ang iyang tumong mao lang ang mahimong “perfect ug buotan nga bana.” Miangkon siya nga bisan sa reklamo sa asawa bahin sa iyang timbang, nag-diet ug nag-ehersisyo siya hangtod nabalian pa gani og tiil.
Bisan pa niini, nangayo siya og higayon nga mausab ang sitwasyon, ug giingon nga dili patas hukman ang kaminyoon sa unang tuig pa lamang.
Sa pagkakaron, gi-postpone sa korte ang kaso aron hatagan pa og higayon ang magtiayon nga mag-uli. Busa sa kalibutan nga daghan nagreklamo nga kulang ang pagtagad, aduna pud diay lugar nga ang problema sobra ang gugma.
Photo courtesy: Bin Eid Law Firm
