Pormal nang giablihan sa Lokal nga Kagamhanan sa Malaybalay City ang pagtrabaho sa Farm-to-Market Road (FMR) sulod sa Daraghuyan Ancestral Domain sa Barangay Dalwangan pinaagi sa groundbreaking ceremony niadtong Pebrero 10, 2026.
Ang dakbayan sa Malaybalay mao ang unang napiling lugar sa Region X nga pagatukoran sa sub-project sa Department of Agriculture (DA) ubos sa Mindanao Inclusive Agriculture Development Project (MIADP).
Ang proyekto naglangkob sa pagpaayo ug pagsemento sa 1.184 kilometro nga dalan nga magkonektar sa Sitio Damitan ug Sitio Ulanguhon sa Barangay Dalwangan.
Adunay kinatibuk-ang kantidad nga ₱17,008,435.87 ang maong imprastraktura ug gilauman nga mahuman sulod sa 195 ka adlaw sugod sa implementasyon sa kontrata niadtong Pebrero 6, 2026.
Sa eksklusibong pakighinabi sa Juander Radyo Malaybalay kang Lana May S. Racines, OIC-RTD for Research and Regulation ug Deputy Project Director sa DA-MIADP Region X, giingong dako ang kaayohan nga madala sa proyekto sa mga residente sa Barangay Dalwangan
ug sa tibuok siyudad, ilabi na sa mga lumad nga mag-uuma.
Matud niya, mapadali ang pagdala sa mga produkto ngadto sa merkado, mapalambo ang produksyon sa agrikultura, ug mas mapahapsay ang paghatag sa batakang serbisyo sa komunidad.
Makatabang usab kini sa pagpaayo sa akses sa edukasyon, kahimsog, ug uban pang serbisyo sa gobyerno, ug mosuporta sa inklusibong pagtubo sa ekonomiya ug pagpaangat sa kahimtang pang-sosyal ug pang-ekonomiya sa Indigenous Cultural Communities/Indigenous Peoples (ICCs/IPs) sa maong lugar.
Photo Courtesy: LGU MALAYBALAY
