Padayon ang DOST-Bukidnon sa pagpalambo sa edukasyon sa lalawigan pinaagi sa ilang mga programa nga nagpunting sa teknolohiya ug kahibalo sa kabataan, labi na sa mga Indigenous People (IP) communities.
Sumala sa opisyal sa ahensya nga si Ms. Nova Belle Calotes-Olloves, Science Research Specialist II sa DOST-Bukidnon, ang inisyatibo usa ka bahin sa Capacity Enhancement for Science and Technology (CEST) Program, nga nagtinguha nga mapalapdan ang kahibalo sa kabataan pinaagi sa makabag-ong teknolohiya.
Sa Pebrero karong tuiga, giplanong matunol ang 20 ka tablets sa mga piling estudyante sa Iskwelahan sa Maramag, Bukidnon. Ang mga tablets adunay DOST courseware, usa ka learning gadget nga gi-preload sa educational software gikan sa DOST, naglangkob sa interactive modules, lessons, ug activities nga nagpalambo sa kahibalo sa Science, Technology, Engineering, ug Math (STEM).
“Pinaagi sa close monitoring sa pipila ka tunghaan nga naka-benepisyo na sa programa, nakita namo nga daghan sa mga estudyante mas epektibong nakatoon gamit ang tablets. Mas napalapad usab ang ilang kahibalo sa Matematika ug teknolohiya,” matod ni Ms. Calotes-Olloves.
Ang proyekto nagpakita sa padayon nga paningkamot sa DOST-Bukidnon nga gamiton ang teknolohiya aron mas mapalig-on ang edukasyon sa lalawigan, ilabi na sa mga kabataan sa IP communities.
