Gipahimatngon karon sa Cyber Crime Unit-10 ang publiko nga mag-amping dili lang sa kasingkasing kundili apil na usab sa bulsa, batok sa misaka nga mga kaso sa love scam, ilabi na karong bulan sa Pebrero nga kasagarang gitawag og “bulan sa gugma.”
Base sa record sa Provincial Cyber Operation Unit-10 sa Bukidnon, aduna na silay natalang mga kaso sa love scam diin kasagaran mga lalaki ang nabiktima, nabroken heart na, nahutdan pa og kwarta.
Matod ni PCPL Roderick B. Cadiven sa Provincial Cyber Crime Unit-10, sa pakighinabi ning sibyahan scripted ug organisado ang pamaagi sa pagpanglimbong sa mga kriminal. Gipasabot niya nga ang mga suspek kasagaran naglihok pinaagi sa social media platforms, diin mogamit sila og peke nga identidad aron makuha ang pagsalig sa ilang biktima.
Ang love scam mao ang panglimbong nga nagpakaaron-ingnon nga nahigugma sa ilang biktima aron makakuha og kwarta, personal nga impormasyon, o pabor gikan sa biktima.
Kasagaran, ang mga scammer dali kaayo mopakita og “gugma,” likayan ang personal nga pakigkita o video call, ug sa ulahi mangayo og kwarta tungod matod pa sa emergency o problema.
Busa, gipahimangnoan sa Cyber Crime Unit-10 sa tanan nga dili dayon motuo, ug dili magpadala og kwarta sa mga kaila ra sa online. Kung adunay kahadlokan o kahimtangan nga nagduda, gidasig ang publiko nga i-report dayon sa kapulisan.
Photo Courtesy: Siam Legal
