Gikandadohan sa usa ka 49-anyos ang iyang kaugalingon sa kwarto naila ang maong lalaki nga si Skip Boyce sa Utah, U.S.A. Sulod sa 365 ka adlaw kini mao ang iyang dakong lakang paingon sa usa ka “hingpit nga pagbag-o sa estilo sa kinabuhi.
Gisugdan ni Boyce ang iyang gitawag nga “Isolation Year” niadtong Enero 10, 2026, ug gilauman nga mogawas lamang siya karong Enero 2027.
Sulod sa usa ka tuig, magpabilin siya sa usa ka self-contained nga kwarto sa iyang balay nga kompleto sa banyo, usa ka yano nga kusina, usa ka mini-gym, ug usa ka streaming setup.
Ang tibuok eksperimento gi-livestream 24/7 sa iyang YouTube channel nga “The Isolation Year” para makita sa publiko. Ang iyang asawa, nga naa pa uban kaniya sa balay, nagsilbi nga support system, naghatod sa pagkaon ug mga suplay sa gawas sa pultahan.
Ang unang tumong ni Boyce mao ang disiplina ug kahimsog. Tumong niya nga makunhuran ang iyang timbang gikan sa 315 lbs ngadto sa 205 lbs gamit ang plano sa ehersisyo gikan sa usa ka personal trainer. Gusto usab niya nga gamiton ang oras sa pagkat-on og bag-ong mga kahanas ug hingpit nga paglikay sa alkohol.
Bisan pa man og gipasalig niya nga nakaagi siya og medical checkup sa dili pa magsugod, ang ubang mga eksperto ug netizens nagpasidaan nga ang dugay nga pag-inusara ug kakulang sa sosyal nga interaksyon mahimong adunay negatibo nga epekto sa iyang kahimsog sa pangisip. Bisan pa, determinado si Boyce nga tapuson ang hagit aron mabag-o ang iyang kinabuhi.
Photo Courtesy:Philstar News
