Pormal ng gipasakaan ug kaso ang usa ka lalaki human nga giingong nagpakaaron-ingnong kini nga ahente sa Federal Bureau of Investigation (FBI) sa usa ka prisohan sa Estados Unidos aron nga sulayan niini nga magpagawas ug usa ka piniriso. Ang suspek giila nga si Mark Anderson, 36-anyos.
Base sa report, nadakpan ang akusado niadtong Enero 28 sa dihang ang mga kawani sa prisohan sa New York nangayo kaniya ug kredensyal, apan wala kini mapakita gawas na lamang sa lisensya sa pagmaneho. Sa pag-inspeksyon sa mga otoridad nakit an sa bag nga dala sa suspek ang usa ka dako nga barbecue fork ug usa ka lingin nga puthaw nga blade.
Nasayran nga plano unta niining ipagawas ang usa ka piniriso nga naila nga si Luigi Mangione, 27-anyos, kinsa usa ka high-profile ug giakusahan sa pagpatay sa United Healthcare CEO nga si Brian Thompson niadtong Disyembre 2024.
Ang pagpatay sa biktima nakuhaan pa ug video ug kini nakahikurat sa mga Amerikano ug nakahatag ug kasuko sa publiko.
