Gipasigarbo sa Philippine National Police (PNP) nga sukad sa paglingkod ni PNP Chief Gen. Jose Melencio Nartatez Jr., mukabat na sa 23,708 ka wanted persons ang nasikop ug 19,922 ka anti-illegal drug operations ang gipahigayon nga nagresulta sa 23,196 ka drug-related arrests ingon man ang pagkarekober sa 45,734 ka loose firearms.
Dugang pa, nagpahigayon usab ang kapulisan ug 408 ka cybercrime operations nga miresulta sa pagkasikop sa 511 ka mga indibidwal samtang gipatuman usab ang 1,468 ka anti-smuggling operations nga nagresulta sa pagkasakmit sa P3.95 bilyon pesos nga kantidad smagol nga sigarilyo ingon man 243,408 ka anti-carnapping operations ang gipahigayon ug misangpot sa pagbawi sa 877 ka kinawat nga mga sakyanan.
Gikataho usab sa kapulisan nga mikunhod ug 11.68 porsyento ang mga index crimes ug 11.64 porsyento usab ang focus crimes. Samtang ang crime solution efficiency misaka ngadto sa 84.40 porsyento, samtang ang index ug focus crime solution efficiency mitaas usab sa 65.13 porsyento.
Sa pikas bahin, atol sa unang hiniusang Foundation Day ug Police Service Anniversary sa PNP, gipadayag ni Nartatez ang iyang plano karung tuiga diin lakip sa iyang gustong mahitabo mao ang pagpalig-on sa forensic ug prosecutorial coordination, fully operationalizing sa Unified 911 ug pagpadayon sa infrastructure ug capability upgrades ubos sa P6.97-bilyon nga alokasyon sa 2026 General Appropriations Act.
Samtang gimandoan usab niini ang pwersa sa pagpalig-on sa ilang disiplina, integridad ug pagpakusog sa mga operasyon.
Photo Courtesy: PTV News
