Misaad si Presidente Ferdinand Marcos Jr. nga ipadayon ug palig-onon ang reporma sa sistema sa edukasyon human niya gidawat ang final report sa Second Congressional Commission on Education (EDCOM 2) sa Malacañang niadtong Enero 29.
Naglangkob ang report sa tulo ka tuig nga national assessment sa kahimtangan sa edukasyon ug kauban niini ang National Education and Workforce Development Plan 2026–2035, usa ka 10-ka-tuig nga roadmap nga naghiusa sa paningkamot sa DepEd, CHED, ug TESDA aron matubag ang krisis sa edukasyon ug maangay ang workforce sa tumong sa ekonomiya sa nasud.
Matod sa Pangulo, gipunting sa iyang administrasyon ang pagtabon sa learning gaps nga nabilin sa pandemya ug giusab ang basic education curriculum aron mahimong learner-centered, skill-focused, ug decongested.
Gipasiugda usab ni PBBM ang Php1.3 trilyon nga badyet sa edukasyon sa 2026, katumbas sa 4.36 porsyento sa GDP, nga unang higayon nga milapas sa global benchmark sa education spending ang Pilipinas. Pinaagi niini, gilauman ang pagkuha og dugang magtutudlo, pagpalig-on sa learning recovery, ug pagpaayo sa mga pasilidad sa eskuylahan.
Photo Courtesy: Journal News Online
