Gikinahanglan na nga repasuhon o i-review ug dili angay abandunahon nalang ang nasuspende nga implementasyon sa Local Public Transport Route Plan (LPTRP) sa syudad sa Cagayan de Oro.
Atol sa special report ni Konsehal Roger Abaday sa regular nga sesyon sa konseho kaniadtong adlawng lunes, iyahang gipasabot nga ang LPTRP dili lamang usa ka local policy choice apan usa kini ka national requirements.
Kahinumduman nga kaniadtong June 3, 2025 hingpit nga gipatuman ang LPTRP, apan daling gisuspend tungod sa mga valid concerns sa mga stakeholders nga labing naapektuhan sa pagba-o sa ruta.
Naglisod sa pag-adjust dili lang ang mga commuters apan labi na sab ang mga driver-operators sa transport sector nga dakong epekto sab diha sa ilahang panginabuhian.
Saysay pa ni Konsehal Abaday, tuod daghang hagit diha sa pagpatuman sa LPTRP, inay nga abandunahon, giawhag niya ang mga kaubanan sa konseho nga tabangan kini sa pag-review uban sa lain pang ahensya sa lokal nga panggamhanan sa syudad.
Photo courtesy: Cagayan de Oro-LGU
