Gilunsad sa Highway Patrol Group (HPG) kauban ang Land Transportation Office (LTO) ug ang lokal nga pangagamhanan sa dakbayan sa Valencia ang usa ka road safety initiative nga naglakip sa pagpanghatag og libreng helmet alang sa mga motorcycle rider.
Ang maong kalihokan gipahigayon kagahapon sa Sayre Highway, Barangay Laguitas, Malaybalay City, sa tumong pagpalig-on sa pag-amping sa mga motorista, ilabina sa kanunay ug hustong pagsul-ob sa standard nga helmet isip usa ka mandatory nga safety requirement ubos sa balaod trapiko sa Pilipinas.
Matod ni PCOL. Roel R. Sermese Regional Chief sa Regional Highway Patrol Unit-10, ang kolaborasyon tali sa HPG, LTO, ug lokal nga pangagamhanan sa Valencia nagtinguha nga maluwas ang mga kinabuhi pinaagi sa paghatag og protective gear sa mga rider nga nagkinahanglan og suporta, ilabina sa mga dalan nga dunay taas nga volume sa trapiko sama sa Sayre Highway.
Ang maong inisyatibo kabahin sa mas halapad nga kampanya sa road safety awareness nga nagtumong sa pagminus sa peligro sa aksidente sa tibuok probinsya sa Bukidnon.
Ang pagsul-ob og sertipikado ug standard nga helmet gikinahanglan ubos sa Republic Act No. 10054 o Motorcycle Helmet Law, tungod kay kini dakong tabang sa pagpamenos sa risgo sa grabe nga kadaut o kamatayon sa panahon sa aksidente.
Photo Courtesy: HPG-10
