Giisip nga “fit to take part” o anaa sa saktong kondisyon si kanhi presidente Rodrigo Duterte sa pre-trial proceedings sa International Criminal Court (ICC) kalabot sa iyang kaso sa crimes against humanity, sumala sa pahibalo sa Pre-Trial Chamber I.
Matod sa ICC, pormal nang magsugod ang confirmation hearing ni Duterte karong Pebrero 23. Kahinumduman nga mihangyo ang kampo ni Duterte og indefinite adjournment o walay gitagal nga paghunong sa mga pagdungog, apil na ang confirmation hearing, sa pag-ingon nga dili siya angayan nga mosalmot tungod sa iyang kahimtang.
Nagpili ang chamber og panel sa tulo ka medical experts aron mopahigayon og medikal nga pagsusi, ug nagsumite si Duterte og assessment report niadtong Disyembre.
“Tungod sa mga legal nga prinsipyo, ang medikal nga assessment sa mga independenteng eksperto nga naglangkob sa Panel, ug ang tanang mahinungdanong kahimtang sa kaso, natagbaw ang Chamber nga si Duterte makahimo sa paggamit sa iyang mga katungod sa proseso ug busa anaa sa saktong kondisyon sa pag-apil sa pre-trial proceedings, nga karon gipadayon na,” matod sa Pre-Trial Chamber I.
Sumala sa ICC, magpagawas sila og kamanduan sa labing daling panahon aron maghatag og direksyon aron mapadali ang partisipasyon ni Duterte sa pagdungog.
Ang confirmation hearing, nga orihinal nga gitakda niadtong Septyembre 2025, ang motino kon igo ba ang ebidensya aron tuohan nga sad-an si Duterte, kinsa magsaulog sa iyang ika-81 nga adlawng natawhan karong Marso.
“Kon usa o labaw pa sa mga pasangil ang makumpirma, ang kaso ibalhin ngadto sa usa ka Trial Chamber, nga mopahigayon sa sunod nga hugna sa proseso: ang pagsulay o trial,” dugang sa ICC.
Gidudahan si Duterte sa mga crimes against humanity nga murder ug attempted murder, nga giingong nahitabo sa Pilipinas gikan niadtong Nobyembre 2011 hangtod Marso 2019 isip kabahin sa kampanya batok sa ilegal nga droga. Gidakop si Duterte niadtong Marso 11, 2025, ug gidala sa kustodiya sa ICC sa The Hague niadtong Marso 12.
Photo courtesy: International Criminal Court
