Gikasubo sa World Health Organization (WHO) ang pahibalo sa Estados Unidos nga kini hingpit nang mobiya isip miyembro sa organisasyon. Sumala sa WHO, dako og nahimong amot ang Amerika sa mga kalamposan sa organisasyon, lakip na ang pagpapas sa smallpox ug ang pagpakigbatok sa polio, HIV, Ebola, influenza, tuberculosis, malaria, ug uban pang mga sakit.
Gipadayag sa WHO ang ilang pagmahay sa desisyon sa USA nga makaapekto dili lamang sa ilang kaugalingong nasod kondili sa kaluwasan sa tibuok kalibutan. Ang hisgutanan pagatuki-on sa WHO Executive Board karong Pebrero 2, 2026, ug sa World Health Assembly sa Mayo 2026.
Gituligsa sa Estados Unidos ang giingong kapakyasan sa WHO sa pagtubag sa COVID-19 pandemic, apan gipasaligan sa WHO nga paspas ug klaro ang ilang nahimong aksyon sa pagpaambit sa impormasyon ug paghatag og giya sa mga nasod.
Hugot usab nga gihimakak sa WHO ang pasangil nga kini nahimong politisado ug gidumala sa mga nasod nga supak sa interes sa Amerika. Gipahayag sa organisasyon nga nagpabilin kini nga impartial (walay gidapigan) ug matinud-anon sa tanang 194 ka Member States niini.
Naglaum ang WHO nga sa umaabot, mabalik ang pakiglambigit sa Estados Unidos, samtang padayon nilang gituman ang ilang mandato nga masiguro ang labing taas nga ang-ang sa panglawas isip katungod sa tanang katawhan.
Photo courtesy: World Health Organization
