Angol ang usa ka 12-anyos nga batang lalaki human siya giatake sa usa ka dako nga iho sa Sydney Harbour niadtong Domingo sa hapon, sumala sa Australian police.
Nahitabo ang insidente samtang ang bata ug iyang mga higala nangaligo sa dagat duol sa Shark Beach sa suburb Vaucluse. Gituohang bull shark ang miatake sa bata ug grabe ang kadaot nga naangkon sa lawas sa bata.
Sumala sa kapulisan, ang kusog nga ulan sa miaging mga adlaw nakapahinabo sa tab-ang ug lapukon nga tubig sa pantalan, kahimtangan nga makita sa lugar nga anaa ang bull shark ug posibleng nakaamot sa pag-atake.
Samtang pag-abot sa kapulisan niadtong panahona, wala na’y panimuot ang bata ug gihatagan og first aid, lakip ang pagbutang og duha ka tourniquet sa iyang mga bitiis aron mapugngan ang pagdugo, sa wala pa siya gidala sa ospital.
Sa kasamtangan ang bata karon anaa sa intensive care unit sa Sydney Children’s Hospital.
Photo Courtesy: Philstar
