Nakitaan og potensyal ang Suba sa Bungkalalan sa Barangay Baikingon isip destinasyon alang sa eco-adventure tourism nga makadani og mga bisita sa Dakbayan sa Cagayan de Oro, Gipaabot ni Konsehal Joyleen ‘Girlie’ Balaba atol sa iyahang special report sa ika-21 nga City Council.
Gihisgotan ni Balaba ang madanihong kinaiyahan sa Suba sa Bungkalalan ug ang kaangayan niini alang sa nagkadaiyang mga kalihokan nga nakabase sa kinaiyahan. Matod niya, naglakip kini sa kayaking, bamboo rafting, paglangoy, wildlife viewing, river trekking, ug mga educational tour.
Sumala ni Balaba, kinsa nangulo sa tourism committee sa konseho, pinaagi sa saktong pagplano ug partisipasyon sa komunidad, ang Suba sa Bungkalalan mamahimong usa ka modelo nga eco-adventure tourism destination nga nagbalanse sa paglambo sa ekonomiya, pagpanalipod sa kinaiyahan, ug paghatag og bili sa kultura.
Gisuportahan ni Konsehal George Christopher Goking, ang tsirman sa trade and commerce committee, ang sugyot ni Balaba. Matod niya nga pamilyar siya sa dapit tungod kay nakahimo na siya og susamang mga pagtuon sa suba alang sa iyang thesis niadtong panahon sa iyang kolehiyo.
Photo courtesy: BLGU Baikingon
