Moabot karong semanaha sa Northern Mindanao ang usa ka high-level delegation gikan sa European Union aron palig-onon ang relasyon ug susihon ang mga development projects sa rehiyon.
Sumala sa Cagayan de Oro Press Club, nga kauban sa Philippine Information Agency sa pag-organisa sa press briefing, manguna sa pagbisita ang EU Ambassador sa Pilipinas, kauban ang mga ambassador ug chargés d’affaires gikan sa nagkadaiyang EU member states.
Matod ni COPC President Froilan Gallardo, bisitahon sa mga EU envoys ang Cagayan de Oro ug Bukidnon aron mas maila ang kahimtangan sa ekonomiya ug sosyal nga kalamboan sa rehiyon.
Sa ilang pag-abot, maghimo sila og courtesy calls kang Cagayan de Oro Mayor Rolando Uy ug Misamis Oriental Governor Juliette Uy.
Susihon usab sa delegasyon ang mga EU-funded projects, lakip ang SPADe project nga nagpunting sa pagpalambo sa agricultural value chain, investment promotion, ug peace-building sa Mindanao.
Apil usab sa ilang agenda ang pagbisita sa Ozamiz Tri-City Justice Zone, usa ka programa nga gisuportahan sa EU aron mapalambo ang sistema sa hustisya. Tapuson ang ilang pagbisita pinaagi sa media briefing karong adlawa, Enero 15.
Photo courtesy: Cagayan de Oro City Information
