Nakalusot sa ika-21 nga Konseho sa Cagayan de Oro City ang ordinansa nga maghatag og komportable nga kasinatian sa mga pedestrian, pinaagi sa pagtukod og usa ka sustainable elevated walkway system sa mga nag-unang commercial areas ug public districts sa dakbayan.
Ang sugyot nagtumong sa pagpalambo sa koneksyon, pagpamenos sa kahuot sa trapiko, ug pagpaayo sa dagan sa mga sakyanan ug mga tawo sa mga dapit nga daghan og tawo sama sa CM Recto Avenue, Limketkai Center ug Agora, Cogon, Divisoria, ug uban pang mga dapit nga giila sa City Planning and Development Office (CPDO).
Aron mapatuman ang plano, ang kagamhanang lokal mogahin og pundo gikan sa general fund, lakip na tinuig nga pundo gikan sa ilang special program fund sa padayon nga operasyon niini.
Mosulod usab ang dakbayan sa mga Public-Private Partnership (PPP) nga kasabutan uban sa mga tag-iya og mall, real estate developers, bangko, ug mga pribadong korporasyon. Maghimo usab og mga paagi aron makakwarta ang proyekto pinaagi sa pagtugot sa mga advertisement panels, digital billboards, ATM, booths sa mga lokal nga negosyante (MSMEs), ug naming rights o sponsorship sa mga seksyon sa walkway.
Ang kita gikan sa mga renta, base sa probisyon sa ordinansa, gamiton alang sa pagmentinar ug pagpalapad sa agianan.
Photo courtesy: DPWH
