Nagpahimangno ang Bureau of Immigration (BI) sa publiko, batok sa online romance o love scam nga naggamit sa pangalan ug otoridad sa ahensya sa paglingla sa mga biktima ug pagpangayo og kwarta.
Kini nunot sa reklamo sa usa ka babaye ngadto sa BI ,aron i-verify ang email nga giingong gipadala sa usa ka immigration officer kalabot sa paghatod sa parcel gikan sa laing nasod.
Matod sa BI, ang email nag-ingon nga ang package nga gipadala sa giingong langyaw nga uyab sa babaye “na-intercept” sa “Bureau of Immigration under the Ministry of Interior” ug gikinahanglan ang bayad aron ma-release kini.
Kusganong gihimakak sa BI nga gikan kanila ang email message ug niinsister nga kabahin kini sa love scam.
Giklaro sa ahensya nga wala kini sa ilawom sa bisan unsang Ministry of Interior ug wala kini otoridad sa pag-intercept sa mga parcel, pagproseso sa pagpadala, o pagsingil sa mga bayad alang sa pagpagawas sa bisan unsang mga package.
Ang insidente gi-endorso na sa Cybercrime Investigation and Coordinating Center (CICC) ug sa Cybercrime Division sa National Bureau of Investigation (NBI), alang sa dugang imbestigasyon.
Nakig-alayon usab ang BI sa ubang ahensya sa gobyerno aron matubag ang susamang mga scam.
Giawhag sa ahensya ang publiko nga magmabinantayon sa pagpakig-uban sa mga kaila online, ilabi na niadtong nangayo og kwarta o nangangkon nga nagpadala og package nga nagkinahanglan og bayad sa gobyerno.
