Padayon pang gipangita karon sa Bansalan Municipal Police Station (MPS) ang tulo ka lalaki nga gituohang responsable sa insidente sa malicious mischief human ilang gipaulanan og bato ang usa ka Fuso truck sa Brgy. Tubod, Bansalan, Davao del Sur.
Sumala sa report sa kapulisan, alas-1:10 sa kaadlawon niadtong nakalabay nga adlaw, padulong sa Bansalan gikan sa Tacurong, Sultan Kudarat ang Fuso truck nga kargado og mga sako sa bugas ug gimaneho ni Emeliano Abellanosa Ampoloquio, kauban ang iyang helper nga si Genmike W. Hernaz, pag-abot nila sa Km. 78, Brgy. Tubod, apan kalit lang nibabag sa ilang dalan ang sa usa ka Honda RS nga motorsiklo.
Human niini, gisugdan paglabay og bato ang atubangan nga windshield sa truck sa tulo ka persona nga giila sa alias nga “Elmer”, 35-anyos; “Juan”, 19-anyos; ug “Darryl”, 27-anyos, pareho mga residente sa Brgy. Sinayawan, Hagonoy, Davao del Sur.
Tungod sa kahadlok, gipadagan paabante sa drayber ang truck nga nakaigo sa maong motorsiklo, nga nadala ilawom sa sakyanan sulod sa kapin 300 metros padulong sa Lower Satar, Brgy. Tubod. Padayon gihapon ang pagsunod sa tulo ka suspek ug sa dihang mihunong ang truck, gisundan usab kini og paglabay og bato nga kapin upat ka beses. Tungod niini, dali nga mikanaog ug mikalagiw ang drayber ug helper.
Nailhan sa drayber ang mga suspek tungod kay dugay na silang nagkaila ug pareho ra og gitrabahoan. Gilayon nga nagpahigayon og hot pursuit operation ang Bansalan MPS, apan wala pa makit-an ang tulo ka suspetsado ug wala usab kahibalo ang mga residente sa ilang kahimtangan.
Padayon pa ang imbestigasyon sa kapulisan aron madakpan ang mga suspek og matubag ang maong insidente.
