Gipasalig sa Panggamhanan sa Probinsiyal sa Albay, nga pinangulohan ni Gobernador Noel Rosal, nga andam ang probinsiya sa bisan unsang kausaban sa alert level sa Bulkang Mayon.
Sa pagkakaron, ang alert level nagpabilin sa Alert Level, apan ang probinsya nangandam sa posibleng pagsaka niini ngadto sa Alert Level 4.
Matod ni Gobernador Rosal, kung mosaka sa alert level 4, gikinahanglan ang pagbakwit sa kapin 70,000 ka mga tawo gikan sa mga apektadong lugar.
Isip pagpangandam, gimando usab ang dinaliang pag-ayo sa mga evacuation centers sa nagkadaiyang dapit sa probinsya aron masiguro ang kaluwasan ug kaharuhay sa mga bakwit.
Dugang pa, gipasiugda ni Gobernador Rosal ang kamahinungdanon sa responsableng paggamit sa Calamity Fund sa probinsiya. Iyang gipasalig nga ang pundo magamit sa husto ug epektibo aron matubag ang panginahanglan sa mga apektadong residente.
Sa samang higayon, ang Department of Social Welfare and Development (DSWD) nipasalig nga adunay igong suplay sa food packs alang sa mga bakwit sulod sa unom ka buwan.
Samtang, sumala pa kay Dr. Paul Alanis sa DOST-PHIVOLCS, walay indikasyon sa karon nga dapat ipataas sa Alert Level 4.
Kini tungod kay walay dakong pagtaas sa kalihokan sa Bulkang Mayon. Hinuon, padayon pa nilang gimonitor ug gisusi ang sitwasyon sa bulkan.
Photo Courtesy: DOST-PHIVOLCS
