Niubos na usab ang foreign direct investments (FDI) sa Pilipinas niadtong Oktubre tungod sa epekto sa kumpyansa sa mga magpapatigayon (investors) sa nasod, sumala sa Bangko Sentral ng Pilipinas (BSP).
Base sa datos sa BSP, ang FDI net inflows niubos og hapit 40% ngadto sa $642 million niadtong Oktubre 2025, gikan sa $1.067 billion sa susamang buwan niadtong 2024.
Tungod niini, niabot na lang sa $6.2 billion ang kinatibuk-ang FDI inflows sa unang napulo ka buwan sa tuig, mas ubos og 25% kon itandi sa $8.2 billion sa susamang panahon niadtong 2024.
Naglaum ang BSP og kinatibuk-ang FDI net inflow nga $7.5 billion para sa tibuok tuig, busa ang datos gikan sa Enero hangtod Oktubre sa 2025 anaa na sa banabana nga 83% sa projection sa BSP.
Photo courtesy: Bangko Sentral ng Pilipinas
