Nibarog ang tibuok han-ay sa Armed Forces of the Philippines (AFP) nga nagpabiling lig-on taliwala sa gihimong pamahayag nga “withdrawal of support” sa usa ka military official.
Sa usa ka press conference kagahapong adlawa, Enero 13, gipahayag ni AFP Spokesperson Col. Francel Margareth Padilla nga ang pagbawi sa suporta ni Col Audie Mongao dili makaapekto sa ilang hukbo, nga nagpasabot nga nagkahiusa ang Sandatahang Lakas bisan pa man sa mga isyu.
Wala pa’y pormal nga mga kaso nga nakatakdang ipasaka batok kang Mongao apan gipaniguro ni Padilla nga gipaubos na sa imbestigasyon ang pamahayag ug nagpadayon pa ang mga inquiry mahitungod niini.
Matod pa sa tigpamaba sa AFP, paniguroon nga moagi sa saktong proseso ug mahimong makiangayon ang kaso ni Col. Mongao, diin gihatagan og gibug-aton ni Padilla nga ang proseso sa imbestigasyon subay sa naglungtad nga mga balaod ug polisiya sa Sandatahang Lakas sa Pilipinas.
Gawas niini, gipasiugdahan usab ni Padilla nga dili na kinahanglan pang ipaubos sa “loyalty check” ang ilang tibuok tropa tungod kay nagtuo ang tibuok hukbo nga kaila nila ang ilang mga personahe ug nagpabilin ang ilang pagsalig ug respeto sa mga higher authorities.
Padayon usab sumala pa nga mosunod sa ilang gipanumpaang mandato ang ilang han-ay ug magpabiling maunongon sa organisasyon ug lakip na sa konstitusyon.
Sa laing bahin, nagpabilin sa kustodiya sa militar si Col. Mongao samtang nagpadayon ang imbestigasyon mahitungod sa iyang mga gihimong pamahayag.
Photo courtesy: Philippines News Agency
