Dul-an sa 120 ka mga indibidwal ang patay diin 7 niini ang mga bata sa padayon nga nahitabong protesta kontra sa gobyerno sa Iran.
Matod sa US based Human Right Activists New Agency (Hirana) nga anaa na sa 2,638 ang nasikop samtang nagpadayon ang kilos-protesta nga anaa na sa 15 kaadlaw. Anaa sab 109 nga mga myembro sa security forces ang nakalas taliwa sa mga protesta.
Nunot sab sa maong panghitabo sa nasud, sobra 60 oras na nga walay koneksyon sa internet sa Iran diin gituohan usa ka lakang aron mapugngan ang pagkatap og impormasyon ug koordinasyon sa mga raliyista.
Nagsugod ang protesta niadtong katapusang semana sa buwan sa Disyembre human magmartsa ang komunidad sa sentro sa Tehran batok sa nagsaka nga inflation ug padayon nga pag-ubos sa balor sa nasudnong salapi nga rial.
Samtang nagkalapad ang kilos-protesta, klaro sab ang panawagan batok sa kagamhanan lakip ang gihangyo sa mga tinun-an nga mahimong tingog sa nasud ug panawagan niini nga buntogon ang Islamic Republic.
Photo Courtesy: CTV News
