Padayon ang kusog nga kampanya sa back-to-back champion Cebu Eastern College (CEC) Dragons human sila molampornas sa Sacred Heart School–Ateneo de Cebu (SHS-AdC) Magis Eagles, 74-36, alang sa ikaduhang sunod nga kadaugan sa 12-Under division sa CESAFI Season 25 basketball tournament niadtong nakalabay nga adlaw sa University of the Visayas–Main Gymnasium sa Cebu City.
Gipangunahan ni Shariff Jhailil Samad ang Dragons ang 19 puntos, samtang si Francis Jeevan Macalisang ug Perseus Berame miamot og 12 puntos matag usa, nga mipahimutang sa CEC sa solo nga liderato uban ang 2-0 rekord.
Sa laing duwa, namawi ang University of San Jose–Recoletos (USJ-R) Jaguar Cubs human nila gipildi ang Don Bosco Technical College (DBTC)-Cebu Greywolves, 53-29. Human sa suod nga tres ka kuwarter, mibutho ang Jaguar Cubs og 31-8 nga dagan sa katapusang kuwarter aron masiguro ang kadaugan.
Nakab-ot usab sa Cebu Institute of Technology–University (CIT-U) Baby Wildcats ang ilang unang daog sa season pinaagi sa 54-45 nga kadaogan batok sa San Carlos School of Cebu (SCSC) Baby Warriors. Gipangunahan ni Feljun Abrenica ang Baby Wildcats sa 11 puntos, samtang nagkumbinar og 15 puntos sila Kendrick Khor ug Phil Rowe Lagcao.
