Nisaka ngadto sa onse porsyento ang natalang kaso sa tipdas sa Northern Mindanao Region sa niaging tuig, subay sa datos nga nahipos sa Department of Health Region X.
Kini human nakatala og 411 ka kaso sa measles kon tipdas nga mas taas kung itandi sa 371 ka kaso sa tuig 2024 kung asa anaa sa 74 posyento sa natakdan ang walay bakuna.
Gipasabot ni Dr. Germaine Mariz Labadan, Medical Officer III Family Health Cluster (FHC) nga tungod niini nga pagsaka sa kaso sa tipdas labing gikinahanglan nga magpatuman og halapad nga pagbakuna batok measles, lahi pa kini sa naunang mga doses sa bakuna batok tipdas.
Ginatumbok ni Dra Labadan ang Measles-Rubella Special Immunization Activity (MR-SIA) nga magsugod sa Enero 19 hangtod Pebrero 13. Target nga mahatagan niini ang mga batang nag-edad sa unom hangtud 59 ka bulan.
Magsilbi sab kini nga boosters sa mga bata nga nabakunahan na sa una ug ikaduha nga dose ug dakong tabang aron nga mapugngan ang posibleng outbreak sa tipdas dinhi sa rehiyon.
Kahibaluang labihan ka makatakod kining sakit nga tipdas kung asa sagad matapnan ang mga kabataan nga magdala og dakong risgo ug delikado nga komplikasyon sa ilahang panglawas busa perming ginaawhag sa department sa panglawas ang mga ginikanan nga pabakunahan ang ilahang mga anak.
Photo courtesy: Radio- Canada
