Gibutyag sa kadumalahan sa Business Permit and Licensing Office kon BPLO sa Iligan City ang detalyado ug klarong proseso sa pag-renew sa business permit, lakip ang mga kinahanglanon nga dokumento ug mga lakang aron malikayan ang kalibog sa mga negosyante.
Kini ang gi-detalye ni Maria Rhodora Omlero, Division Head sa Permits and Licenses Division sa City Mayor’s Office–Iligan, atol sa esklusibong pakighinabi sa Juander Radyo News Team.
Sumala ni Omlero, ang unang buhaton sa negosyante nga mag-renew sa business permit mao ang pagkompleto sa registration sa business permit; diin alang sa trade name ug single proprietorship, kinahanglan ang DTI registration; alang sa corporation, gikinahanglan ang SEC registration; samtang ang cooperative o association, kinahanglan ang CDA ug DOLE registration.
Human niini, kinahanglan usab magkuha ug tax declaration sa property nga gi-occupy sa negosyo, o kon nag-abang lang sa property, magdala ug notarized lease sa kontrata.
Matod pa nga kung kompleto na ang tanan nga dokumento, puwede na nga moadto sa BPLO office aron i-fiil-up ang application form. Gibutyag pa ni Omlero, nga sa renewal sa business permit, kinahanglan lang dalhon ang previous permit aron ma-identify ug ma-verify ang negosyo.
Dili usab kalimtan nga moagi sa City Assessor’s Office alang sa updating sa PIN number sa property sa Negosyo sa dili pa moadto sa BPLO alang sa opisyal nga pag-renew.
Pinaagi sa klaro ug istriktong proseso, gipanghinaot sa BPLO-Iligan City nga masiguro ang hapsay, episyente, ug transparent nga pag-renew sa mga business permit, alang sa mas lig-on ug organisadong negosyo sa siyudad.
