Gi-renew sa Department of Social Welfare and Development Field Office X o DSWD-10, pinaagi sa ilang Crisis Intervention Unit, ang Memorandum of Agreement o MOA uban sa 192 ka accredited service providers ilalom sa Assistance to Individuals in Crisis Situations kon AICS Program.
Gipahigayon ang maong kalihokan sulod sa duha ka adlaw niadtong nakalabay nga adlaw sa Pearlmont Hotel sa Cagayan de Oro City. Mitambong ang nagkadaiyang institusyon gikan sa Northern Mindanao ug mga kasikbit nga rehiyon nga naghatag og medikal ug funeral assistance alang sa mga benepisyaryo sa departamento.
Nanguna sa pagpirma sa MOA si Special Assistant to the Secretary ug Officer-in-Charge Regional Director Ramel F. Jamen, kauban si Assistant Regional Director for Operations Dr. Glofelia J. Uwayan (Uayan), uban sa pinili nga mga service provider nga miapil sa ceremonial signing atubangan sa tanang nanambong.
Kauban sa pag-renew sa MOA, gipahigayon usab ang orientation sa updated nga 2026 AICS Guidelines. Gihisgutan niini ang kinatibuk-ang pagpasabot sa programa, ang mga dokumentong gikinahanglan aron maka-avail og tabang, lakip na ang legal nga basihan ug mga polisiya kabahin sa tax deductions sa Guarantee Letters (GLs), ug ang paagi sa pagkwenta sa withholding tax sa mga produkto ug serbisyo.
Sa unang adlaw sa kalihokan, mitambong ang mga representante sa mga ospital ug providers sa medical ug assistive devices, samtang sa ikaduhang adlaw, ang mga botika ug mga punerarya ang miapil.
Sa iyang mensahe, gipasiugda ni Director Jamen nga ang AICS program dili lamang alang sa mga kabus ug marginalized, kondili abri usab kini sa tanang indibidwal ug pamilya nga naigo sa kalit ug wala damhang krisis.
Pinaagi sa maong kalihokan, tumong sa DSWD-10 nga mapalig-on ang panagtinabangay sa mga service providers, masiguro ang pagsunod sa balaod ug transparency, ug ang hapsay ug tukmang pagproseso sa bayad sa Guarantee Letters ilalom sa AICS Program, alang sa mas paspas ug mas episyenteng paghatag og tabang sa katawhan.
