Nag-atubang og kasong graft ang hepe sa Bureau of Customs (BOC) nga si Ariel Nepomuceno ug Bureau of Plant Industry (BPI) Director Gerald Glenn Panganiban, lakip ang ubang opisyal sa duha ka ahensya.
Ang reklamo gisang-at sa Office of the Ombudsman sa grupo sa mga mag-uuma may kalabutan sa 60 ka adlaw nga pagsuspenso sa importasyon sa regular milled ug well-milled rice.
Base sa reklamo nga gipirmahan ni Federation of Free Farmers (FFF) National Manager Raul Montemayor ug MAGSASAKA Chairperson Argel Joseph Cabatbat, gipasanginlan ang mga opisyal sa paglapas sa Anti-Graft and Corrupt Practices Act, grave misconduct, gross neglect of duty, ug conduct prejudicial to the best interest of the service.
Sumala sa reklamo, kapin sa 340,000 ka tonelada sa bugas ang gitugotan gihapon nga makasulod sa nasud bisan pa sa ipatuman nga 60 ka adlaw nga pagsuspenso. Giingon nga 90 porsyento niini mao ang regular ug maayo nga gigaling nga bugas nga sakop sa pagdili.
Matod pa sa mga reklamante, ang BPI Memorandum ug ang clearance of shipments sa Bureau of Customs maoy hinungdan sa pagpasulod sa maong mga kargamento.
Tungod niini, gihangyo sa mga nagreklamo ang hinanaling pag-isyu og preventive suspension order batok sa mga respondents aron mapugngan sila sa paggamit sa ilang mga posisyon sa pag-impluwensya sa imbestigasyon o pag-usab sa mga rekord.
Photo Courtesy:X.COM
