Nagpagawas ang Nestlé og usa ka pangkalibutan nga recall sa pipila ka baby formula tungod sa kabalaka nga mamahimo kining adunay toxin nga hinungdan sa food poisoning, sumala sa taho sa BBC.
Lakip sa mga apektadong batches ang SMA infant formula ug follow-on formula, nga sumala sa kompanya, dili luwas alang sa mga masuso. Ang mga produkto, nga nabaligya sa tibuok kalibutan, posible nga adunay cereulide, nga mahimong hinungdan sa pagsuka ug pagkalipong kon makonsumo sa mga masuso.
Wala pay kumpirmadong taho sa mga apektado tungod sa maong produkto, apan gi-recall kini isip pag-amping o “out of an abundance of caution.”
Matod pa sa Nestlé, “Ang kaluwasan ug kaayohan sa mga bata ang ilang labaw nga prayoridad. Kinasingkasing sila nga nangayo og pasaylo sa bisan unsang kabalaka o kahasol nga gipahinabo niini ngadto sa mga ginikanan, tig-atiman, ug mga kustomer.”
Sakop sa recall ang pipila ka nasod sa Europa, lakip na ang France, Germany, Austria, Denmark, Italy, ug Sweden. Gikumpirma sa kompanya nga ang problema naggikan sa usa ka ingredient gikan sa usa sa ilang mga supplier, ug nagsaad sila og refund alang sa mga apektadong kustomer.
Photo courtesy: BBC News
