Prayoridad sa Department of Education (DepEd), ang pag-ayo sa mga classroom sa higayon nga makadawat na kini sa Php1.015 trilyon nga pundo nga alokasyon alang karong tuiga.
Matod ni Education Secretary Sonny Angara, ang ahensya magtutok sa pagpalig-on sa padayon nga edukasyon sa mga lugar nga naapektuhan sa mga bagyo ug linog sa miaging tuig samtang gisiguro ang kahimsog sa pangisip sa mga estudyante ug magtutudlo.
Partikular nga gitumbok ni Angara, ang grabeng kadaot nga gibilin sa Supertyphoon Uwan nga miguba sa dul-an sa 3,000 ka mga tunghaan sa mga apektadong lugar.
Dugang pa, 10,400 ka classrooms usab ang naguba, nga niresulta sa pipila ka adlaw ug bisan mga semana nga suspension sa klase.
Ang alokasyon ubos sa 2026 budget naglakip sa pagtukod sa Learning Continuity Spaces (LCS) nga mahuman sa pipila lang ka semana.
Samtang, usa sa mga prayoridad sa DepEd mao usab ang pag-umol og polisiya alang sa pagpasiugda sa luwas, inklusibo ug makapadasig nga palibot sa mga eskwelahan isip kabahin sa anti-bullying program sa ahensya.
Photo Courtesy: PNA
