Arestado ang retiradong Major General sa Air Force nga si Romeo Poquiz base sa warrant of arrest, didto sa Ninoy Aquino International Airport sa Pasay City niadtong nakalabay nga adlaw.
Bag-o lang nakabalik si Poquiz gikan sa bakasyon sa Bangkok, Thailand sa dihang gisugat siya sa mga personahe sa Philippine National Police-Criminal Investigation and Detection Group (PNP-CIDG-NCR) nga gipangulohan ni Chief P/Colonel John Guiagui alas 8 sa buntag.
Ang kaso may kalabutan sa pag-aghat og sedisyon tungod sa iyang giingong pag-apil sa protesta sa People Power Monument sa Quezon City niadtong Nobyembre 16 ug 17, 2025.
Gihisgotan usab ang iyang mga post sa social media nga nanawagan sa pagbiya o pagbawi sa suporta alang sa administrasyon ni President Ferdinand Marcos Jr.
Ang warrant of arrest gi-isyu niadtong Disyembre 5, 2025 nga adunay girekomendar nga piyansa nga Php48,000.
Si Poquiz ang convenor sa United People’s Initiative (UPI), usa ka grupo sa mga retiradong opisyal sa militar.
Gidala si Poquiz sa Camp Crame aron iproseso ang iyang pag-aresto sa dili pa siya ipresentar sa Quezon City Regional Trial Court Branch 77.
Samtang, nagtuo si Poquiz nga ang mga kasong rebelyon ug sedisyon nga gisang-at batok kaniya wala’y lain kondili pagpanghadlok.
Sumala ni Poquiz, subo pamalandungon nga ang nangawat og binilyon ug trilyon nag pabilin nga gawasnon ug wala’y tulubagon, apan kadtong nagprotesta ug nagpahayag sa kasuko sa pagpangawat sa kwarta sa katawhan, sama kaniya, ang gipriso.
Si Poquiz diha-diha dayon nagpiyansa alang sa iyang temporaryo nga kagawasan.
Photo Courtesy: South China Morning Post
