Nasikop ang tulo ka mga High Value Individual (HVI) sa mga kapulisan human gilusad ang drug buy-bust operation batok sa ilegal nga droga, niadtong nakalabay nga adlaw sa Purok 5, Barangay San Juan, Surigao City.
Ang operasyon gipangulohan sa Surigao City Police Station – Drug Enforcement Unit (PS-DEU) uban sa tabang sa 1st SDN PMFC ug SDN PDEA RO-13.
Naila ang dinakpan si Jessie Acedo alias “Loloy,” 30-anyos; Ever Gede Febrero, 40-anyos; ug Franklin Yu Encenada Jr. alias “Junior,” 42-anyos.
Sumala sa kapulisan, namaligya og ilegal nga droga ang mga suspetsado. Narekober gikan sa ilang posisyon ang usa ka sachet sa shabu nga gipalit sa poseur buyer ug 13 ka dugang nga sachet sa gituohang shabu, nga adunay kinatibuk-ang timbang nga mokabat sa 15 gramos ug banabana nga balor nga ₱102,000.00.
Gawas pa niini, nasakmit usab ang usa ka ₱1,000 nga marked money, tulo ka cellular phone, usa ka coin purse, ₱200 nga cash, ug usa ka itom nga sling bag.
Ang mga suspetsado ug ang nakumpiskang ebidensiya naka kustodiya na sa Surigao City CPS alang sa hustong dokumentasyon ug pagpasaka og kaso tungod sa paglapas sa Section 5 ug 11, Article II sa RA 9165 o Comprehensive Dangerous Drugs Act of 2002.
