Gipahibalo sa Department of Health (DOH) kagahapong adlawa, nga ipatuman na ang zero balance billing policy sa pipila ka mga ospital nga gipanag-iya sa local government units (LGUs), human ipadayag ni Pangulong Ferdinand Marcos Jr. nga ₱1 bilyon gikan sa budget sa ahensya ang igahin alang sa maong programa.
Sumala sa DOH, gisiguro sa Pangulo nga ang ₱1 bilyon nga pondo gikan sa DOH gamiton aron suportahan ang mga dagkong LGU hospitals sa nasud.
Mahinumduman nga ang zero balance billing policy unang gipatuman niadtong Mayo 18 sa miaging tuig, apan kaniadto limitado lamang kini sa mga pasyente nga naa sa basic o ward accommodation sa 87 ka DOH-operated hospitals.
Gibutyag usab ni Health Secretary Teodoro Herbosa nga dili igo ang ₱1 bilyon nga pondo aron masakop ang tanang LGU hospitals, busa gikinahanglan nga pilion kung unsang mga pasilidad ang unang makabenepisyo.
Matod pa niya, adunay 17 ka Level 3 LGU-owned hospitals sa tibuok nasud, kini nga mga ospital adunay mga serbisyo sama sa intensive care unit (ICU) nga halos pareho sa mga serbisyo nga ginahatag sa mga ospital nga gipalihok sa DOH.
Gisiguro usab sa DOH nga ang pondo direktang mahatag sa mga dagkong LGU hospitals ug dili na kinahanglan ang pagkuha og “guarantee letter” gikan sa mga politiko.
Gawas sa ₱1-bilyon nga alokasyon, giingon usab ni Secretary Herbosa nga ang bahin sa budget sa Medical Assistance to Indigent and Financially Incapacitated Patients (MAIFIP) nga programa sa DOH mahimong gamiton isip dugang pondo alang sa pagpatuman sa zero balance billing policy sa mga LGU hospitals.
Photo courtesy: DOH
