Plantsado na sa lokal nga panggamhanan sa Cagayan de Oro, kapulisan ug pamunuan sa Jesus Nazareno Parish- Archdiocesan Shrine of the Black Nazarene ang mga aktibidad nga ipahigayon atol sa kapistahan sa Itom nga Nazareno labi na ang tradisyon nga Traslacion alang karong tuiga.
Sa gipahigayong press briefing kagahapong adlawa nga gipasiugda sa pamunuan sa Jesus Nazareno Parish, gipresenta gikan sa paghan-ay sa trapiko, pagsiguro sa siguridad, nakahan-ay nga schedule sa misa, ug pagbutang og mga first aid station nga nakaplastar na alang sa luwas ug malinawon nga pagpahigayon sa Traslacion.
Alang sa dugang seguridad, lauman sab ang mga boarder control points ug mga check points sa piling dapit sa syudad.
Enero 8 sa gabie nakatakda nga ibalhin ang imahe sa Itom nga Nazareno gikan sa Jesus Nazareno Parish, paingon sa St. Augustine Cathedral. Adunay mga misa nga ipahigayon gikan gabie hangtud na sa kadlawon sa Enero 9. Kini na sab ang kahigayunan sa mga deboto nga maduol ug mahikap ang imahe sa Itom nga Nazareno ug mag benerasyon.
Atol sa prosesyon sa Enero 9, dili gina-awhag nga maglabay og panyo o mga panapton sa imahe aron na sab malikayan ang kasamok o di ba kaha magkayagaw.
Gitambagan sab ang mga bata, mabdos, edaran nga adunay mga balati-an o maglisod na sa paglakaw nga dili nalang muapil sa prosesyon. Samtang, ginabawal ang pagsuot og kalo ug paggamit og payong atol sa prosesyon.
Giawhag sab ni Jesus Nazareno Parish Priest, Rev. Msgr. Nathaniel C. Lerio ang publiko nga musalmot sa Traslacion inubanan sa panghinaot nga ang ilahang debosyon sa Itom nga Nazareno mas palig-onon ang ilang pagsalig sa Ginoo.
